بقلم: أحلام صبري
هحكيلكم قصتي…
أنا بنت أي حد يشوفها يقول عليها زهرة في بستان الحياة… بنت جميلة، من عيلة مستورة الحال، شكلي حلو، لكن كنت رافضة أرتبط بأي شاب، وشرطي الوحيد في الجواز إنه يحبني حب الجنون.
وفي يوم من الأيام حضرت عيد ميلاد صديقتي، وهناك قابلت شاب حاول يتعرف عليَّ بإصرار، لكن كالعادة رفضت. بعدها بفترة طلعنا رحلة مع الكلية، وهو جه مع أخته مخصوص علشان يقرب مني، وبرضه كنت رافضة… مع إني بصراحة كنت معجبة بيه؛ شاب وسيم ومحترم وابن ناس ودمه خفيف، بس برضه ما استجبتش لرغبته.
بعد الرحلة بحوالي أسبوع دخلت الجامعة لقيت كل الناس بصالي بشكل غريب، قولت عادي… لكن وأنا ماشية شفت ورد وكلمة “بحبك” في كل مكان في الجامعة! قلت أكيد يا بخت البنت اللي متعملها المفاجأة دي… فجأة صديقتي جات وقالتلي: “تعالي، في شاب هيطلب إيد بنت في الكافتيريا”.
روحت معاها أتفرج… أول ما دخلت لقيت لَمَّة شباب كبيرة، ولما قربت اللَّمَّة اتفتحت وطلع منها “أحمد”، وقال بأعلى صوته:
“بحبك، وبتمنى تقبلي تكوني زوجتي على سنة الله ورسوله”
وشالني ولف بيا قدام الجميع!
وطبعًا أي بنت مكاني كانت هتطير من الفرحة… وده اللي حصل فعلًا.
اتخطبنا أنا وأحمد سنة كاملة… كانت أجمل سنة في حياتي، مليانة حب واحترام وعشق ما بعده عشق. وبعدها اتجوزنا وعشنا خمس سنين من السعادة اللي ما كنتش أحلم بيها… لحد ما ظهر أصدقاء السوء وقلبوا حياتنا لجحيم.
تعالوا أعرفكم على أبطال قصتي… وأعرّفكم بنفسي:
أنا ميرفت المنشاوي، دلوقتي عندي 50 سنة، عايشة لوحدي في بيتي بعد ما ولادي سبوني سنين طويلة، واتبروا مني… وكل ده هتعرفوه في مذكراتي.
زوجي:
أحمد فوائد حسن… محاسب كبير في شركات فوائد حسن الصناعية، شاب وسيم ومحترم وكان زوجي الحبيب، ويكبرني بـ3 سنين.
أولادي:
باسم… أو بمعنى أدق الدكتور باسم أحمد فوائد، طبيب جراحة قلب. ده ابني الكبير اللي جه بعد سنة من جوازي، وسميته “باسم” لأنه جه ومعاه بسمة لعيلة فوائد حسن، خصوصًا إن جوزي كان الابن الوحيد ومافيش غيره هو وأخته سوسن، عشان كده الكل كان طاير من الفرح بيه.
ميرنا… أو المهندسة ميرنا، دلوقتي مهندسة ديكور. هي بنتي الثانية، بتصغر عن أخوها بسنتين، وسميناها ميرنا لأنها كانت شبهتي زمان، وكمان لأن كانوا نفسهم يسموني ميرنا وأنا صغيرة، فجوزي قرر يسميها الاسم ده حبًا فيّ.
وهنا تبدأ قصتي الحقيقية…
القصة اللي بدأت بعد جوازي بـ7 سنين…
يتبع...........