نصائح هامه في تربية الابناء
بقلم /شيماء عامر
موضوعنا انهارده عن تربية الأبناء
والنصيحة الأهم فى تربية بناتك واولادك هى انك تصاحبيهم وتحتويهم من الصغر وتفهميهم ردود أفعال الناس تجاههم علشان لما يكبروا يقدروا لوحدهم يكونوا وجهة نظر لما يستقبلوا من الناس اللى بيتعاملوا معاهم اى فعل.
قوى علاقتك بربنا وقربيهم وحببيهم فى الله وعوديهم على الصلاه لانها صله بيننا وبين ربنا وان ربنا بيحبنا علشان كده اوجدنا وخلقنا علشان نكون نافعين وايجابيين
تابعى اولادك بس مش بأسلوب المخبر لا بس عوديه أنه يكلمك عن يومه و كل حاجة بتحصل فيه.
قوى علاقتك بالطفل و بلاش تخليه يخاف يتكلم معاكى بلاش تصديه خلى بابك مفتوح له على طول.
الطفل اللى بيكون صديق لأمه من الصغر بيكون أقل عرضه للاكتئاب.
صاحبى إبنــك وبنتك:
لو علاقتك بطفلك علاقة مبنية على الثقة و الصداقة هيسمع نصائحك لأنه متأكد أنكو أصحاب بجد . دى المفروض تكون أقوى و أحسن علاقة فى حياتك لأن مفيش حد أهم من اولادك و كمان بتساعدك تحميه من أضرار نفسية و مجتمعية كتير.
خليكى صبورة و هادية و متخليش أسئلته تستفزك و جاوبى على أسئلته بصراحة و لو مش عارفة الإجابة دورى و أرجعيله علشان ما يلجأش لأصدقاء يجاوبوه على اسئلته بدون وعى وياعالم تربيتهم ازاى وهيدوا معلومه شكلها ايه خليكى انتى مرجع ابنك
دعمى ثقة طفلك بنفسه عشان ميدورش على المخدرات أو السجاير كعلاج لنقص الثقة.
اعملى مواعيد دخول البيت
لازم يكون فى أتفاق بينكم عن مواعيد ثابته ميتأخرش عنها .
كمان لازم تعرفى تحركاته و أصحابه عشان تعرفى هو بيتعامل مع أيه .
أعرفى أصحابه و أهلهم عشان تحاولى تجنبيه صاحب السوء.
كمان كل ما صاحبتيهم كل ماجنبتيهم الألم من اى حد يتعامل معاهم ويحبوكى ويرعوكى لما تكبرى
افتكرى وأناقلتها قبل كده أولادنا زرعه واللى بيزرع بيهتم بزرعه لغاية مايكبر ويثمر وكل ماكانت رعايتك أكبر كل ما حصدتى زرع أجمل
ربنا يقر عنينا بأولادنا وبناتنا ويرزق كل محروم
تحياتى
بقلم /شيماء عامر