عقول مشوّهة ونفوس مريضة
بقلم /أشــــــــــــرف عبدالعال
بقينا عايشين في زمن غريب، زمن الحق بقى فيه باطل والباطل بقى حق، والقلوب اللي كان مفروض تبقى مليانة بالحب والخير، بقت مليانة غل وحقد وحسد. بقينا محاطين بناس عقولهم مشوّهة ونفوسهم مريضة، لا بيبنوا ولا بيسيبوا غيرهم يبني، كل همهم إنهم ينشروا الفوضى والشك والكلام الفاضي اللي ملوش أي قيمة.
العقول المشوّهة دي مش بتشوف الحقيقة زي ما هي، دايمًا بتقلبها وتلوّنها على مزاجها، تشكك في كل حاجة وتهاجم أي نجاح، كأنهم مش قادرين يشوفوا حد ناجح أو فرحان. أما النفوس المريضة، فدي المصيبة الأكبر، ناس عايشة على الحقد والحسد، كل ما يشوفوا حد عنده نعمة من نعم ربنا، يشتعل الغل في قلبهم، مش بس كارهين الناس، دول كارهين نفسهم قبل أي حد!
الناس دي موجودة حوالينا في كل حتة، بيتعاملوا بوشّين، بيتكلموا عن الأخلاق وهما أبعد ما يكون عنها، يحلفوا إنهم يتمنوا الخير للناس، بس في الحقيقة هما أول من يحسد ويكره ويحاول يوقع غيره. تلاقيهم مستعدين يعملوا أي حاجة عشان يخربوا على اللي حواليهم، كأن سعادتهم في شقاء غيرهم.
المجتمع مش محتاج النوعية دي من البشر، إحنا محتاجين العقول اللي بتنور الطريق، والقلوب اللي بتحب الخير للناس بجد. لازم نحط حد للسم اللي بينشروه، ونعرف إننا أقوى منهم لو حافظنا على نقاء قلوبنا وصفاء نيتنا. الحياة مش مستاهلة كل الكره والغل ده، والرزق بيد ربنا، محدش بياخد أكتر من نصيبه. فبدل ما نضيع وقتنا في مواجهة الناس المريضة دي، نركّز في حياتنا ونعيشها صح، لأن النور دايمًا بيهزم الظلام!
#المستشار