"لما الضهر ينكسر بإيد اللي كنت فاكره سند"
✍🏻 المستشار أشــــــــــــرف عبدالعال
في الحياة، أكتر حاجة بتوجع مش الخيانة ولا الغدر، لكن الوجع الحقيقي هو لما اللي كنت شايفه ضهرك وسندك، يبقى هو السبب في كسرتك. لما تبني لحد مكانة كبيرة في قلبك، وتديه ثقة من غير حساب، وتعتبره زي الأخ أو الصاحب اللي مستحيل يخذلك، وفي الآخر تكتشف إنه هو اللي وقعك من جوه.
الخذلان من حد غريب ممكن تعديها، لكن لما ييجي من حد كنت شايفه عزوتك، ده بيبقى حاجة تانية خالص. بيبقى زي الطعنة في الضهر، بتشعر إنك كنت عايش في وهم، وإن الصورة اللي كنت عاملها لحد معين طلعت مجرد سراب.
ليه بنوجع أكتر لما القريب يخذلنا؟ لأننا بنبني عليهم الأمل، كنا فاكرين إنهم لو الدنيا ضاقت علينا، هنلاقيهم أول ناس يسندونا، لكن للأسف مش كل الناس بتكون قد المسؤولية دي. مش كل اللي بتحبهم بيحبوك بنفس الإخلاص، ومش كل حد كنت فاكره ضهرك هيبقى معاك في الأوقات الصعبة.
الوجع بيبقى أقوى لما الخذلان ده ييجي من حد كنت مستعد تعمل عشانه أي حاجة، كنت واقف جنبه في كل موقف، كنت شايل همه أكتر من همك، وفي الآخر لما احتاجته، سابك، أو الأسوأ من كده، هو اللي كان سبب في وجعك. ساعتها بتحس إن الدنيا ضاقت، وإنك مش قادر تدي ثقتك لحد تاني أبداً.
طيب نعمل إيه؟ نكره الناس؟ لأ، بس نتعلم من التجربة. ندي الثقة بحدود، ما نحطش حياتنا كلها في يد حد تاني، وإن أقوى سند ليك في الحياة هو نفسك. لما تكون واقف على رجلك، مش هيفرق معاك مين غدر ولا مين سابك، لأنك لما تسند نفسك، محدش يقدر يكسرها.