حياة شيخ صعيدى (إبراهيم رفعت)/شيفاتايمز

 أسوأ فيلم لـ فؤاد المهندس / شيفاتايمز 

كتبت/ نورا عواجه ـ  مدير مكتب الأقصر 

مرة سالوا فؤاد المهندس، إيه أسوأ فيلم عملته ، قالهم هو فيلم واحد ، كل ما افتكره اشد في شعري وأقول أيه اللي أنا عملته في نفسي ده .

فؤاد المهندس ، جاله واحد اسمه ابراهيم لطفي، وقاله أنا دارس إخراج في أمريكا، وعندي شهادات كذا وكذا، ووراه الشهادات، ففؤاد قال والله يا واد وعرفت تنقي.. والله يا واد جاتك العالمية..

طيب وريني الفيلم.. قراه مفهمش حاجة.. قال بس هي دي العبقرية.. أصل الفيلم الحلو لازم تفهمه بصعوبة.. فقاله موافق، وجاب معاه شويكار... وسيد زيان والسيد راضي وابراهيم خان وفادية عكاشة.. 

ودخلوا تصوير، الفيلم اسمه نحن الرجال طيبون، وكان انتاج ابراهيم لطفي واخراجه وتأليف اخوه.. في اول الفيلم فؤاد مش فاهم حاجة خالص، بس قال وماله.. في نص الفيلم، فؤاد انهار، وقاله اقطع دراعي من هنا انت لا دارس فن لا هنا ولا في امريكا.. انت بتتعلم فيا.. وقالهم لا تغيروني لا تغيروه.. انا هتجلط لو كملت.. 

وراح فعلا لـمؤسسة السينما وقالهم ابوس ايديكم مشوه او مشوني.. او اعملوا اي حاجة... فقالوله فاضل قد ايه من الفيلم متصورش.. قالهم مش كتير، قالوله خلاص صورهم علشان الراجل ميخسرش.. واهو فيلم يفوت ولا حد يموت..

والفيلم فعلا خلص.. ونزل السينما ومحدش فهم منه حاجة.. واتشال بعد يوم واحد من السينما.. في سابقة غريبة لفيلم لفؤاد المهندس..

الفيلم بيحكي عن شويكار المخرجة في التلفزيون العربي، وهي ست جميلة جدا، بترجع لمصر علشان تخرج افلام، بيشوفها رسام (فؤاد المهندس)، وقرر يرسمها، فبيعمل خدعة انه اعمي فهتتعاطف معاه، وتقرر تعالجه.. قصة ظريفة ويطلع منها شغل كتير، بس مطلعش منها اي حاجة.. الغريب اكتر ان المخرج كان بيسف على المخرجين اللي بيقولوا انهم درسوا برا وهما بطيخ.. 

الغريب ان ابراهيم لطفي دا هو اللي الف وأخرج فيلم لصوص لكن ظرفاء مع احمد مظهر وعادل إمام، وهو واحد من الطف الافلام الكوميدية في مصر، وهو الفيلم اللي بعده كترة سرقة محلات الدهب بفتح الشقق اللي فوقيها.. وبقى كل واحد فوق منه جواهرجي اول ما يهل الليل يجيب الازميل ويحفر... 

الغريب انه معملش غير الفيلمين دول واختفى خالص.. ولغاية دلوقتي محدش يعرف عنه حاجة.. ولا راح فين ولا جه منين ولا عايش ولا ميت...

مش غريبة دي ؟!!

غريبة السينما دي ..!!