حلاوة الدنيا
بقلم / نورا عواجه
فى مشهد من مسلسل حلاوة الدنيا
كانت هند صبري وأختها بيتخانقوا ، فأختها الصغيرة دايقتها بالكلام ، فى الوقت ال هند صبري مصابة بلوكيميا(سرطان الدم) ومش عارفة تقول لأهلها إزاى من كتر ماهى خايفة عليهم ، وفى عز ضغط أختها عليها صرخت وقالتها أنا عندى( كنسر ) أسأل الله العظيم رب العرش العظيم أن يشفى كل مريض يتألم وينعم عليه بموفور الصحة والعافية ،
طبعا أختها حالها أتبدل ١٨٠ درجة بعد ما سمعت الخبر ده .وفضلت تعيط مش مستوعبة إنها ممكن تصحى فى يوم متلقيش أختها قدامها ، هى نفسها مكنتش تعرف هى بتحب أختها قد أيه إلا لما حست إنها هتفقدها ،
كلنا أو أغلبنا كده ضامنين وجود أولادنا وأهلنا وحبيبنا ، وبنأجل الأعتراف بمشاعرنا لكل ال بنحبهم على أساس أنهم عارفين ده وخلاص . وعلى أساس أننا مضمونين بالنسبالهم ، فى الوقت ال مفيش حاجة ولاحد مضمون . كلنا ممكن نروح فى أى لحظة وبدون مقدمات ، خصوصاً فى الزمن ده . مفيش أكتر من موت الفجأة وموت الشباب ربنا يحفظ الجميع ،
وكلنا جوانا طفل رضيع محتاج رعاية مركزة وأهتمام وحب وخوف . وكل مابنكبر وبتزيد همومنا ومسوؤليتنا ، الطفل ال جوانا بيحتاج الحب والأهتمام والرعاية أكتر ، مفيش حد فينا كبير على كلمة حلوة يسمعها أو يقولها ، أو إحساس جميل لو حسه هيفرق معاه كتير قوى . مفيش حد مش محتاج هدية بدون مناسبة ولا باقة ورد وشيكولاته وإعتراف أنه حد مهم فى حياتنا ، وأن مكانه مستحيل حد تانى يملاه ، مفيش حد فينا مش محتاج مفاجأة تشغل قلبه من أول وجديد وتثبتله أن له مكانة فى قلوب حبايبه ،
الدنيا بقت صعبة قوى والهموم والمشاكل والمسؤوليات شغلوا الناس عن نفسها . خصوصاً في ظل الظروف الصعبة ال كلنا بنعانى منها ...
الأم والأب ال ديما ولادهم منتظرين أنهم مصدر عطاء وبس ، محتاجين ياخدوا زى مابيدوا ، ومفيش قانون بيقول طول ما أنت أم أو أب يبقي لازم تتحمل مهما كانت شيلتك تقيلة من غير ماتشتكى ، أو تاخد نفسك وسط سباق الدنيا ال مش بيخلص ،
الأخ الكبير ال بقي أب لإخواته بعد أبوه مامات وعنده بيته وولاده وملزم أنه يبقي قوى ومتماسك طول الوقت علشان خاطر الكل ، هو كمان محتاج حب وإهتمام
الست ال الدنيا خلتها راجل بالعافيه ، وملزمة تبقي أم وأب ودماغ شغاله طول اليوم وبنك مركزى طول العمر ومش مهم بتجيب منين ولا بتتصرف إزاى ، محتاجة تاخد رست وتلاقي هى كمان كتف تتسند عليه زى ما الكل مسنود عليها ، وحد يسألها عن أحوالها ومحتاجة حاجه ولا لا حتى لو بالكدب ،
الأخت الكبيرة ال ضحت بمستقبلها وأحلامها علشان تربي أخواتها بعد أمها ما ماتت ، محتاجه تاخد نفسها وترتاح شويه علشان تقدر تكمل ، من حقها تحس بالحب والإهتمام من ال حواليها ، بلاش نبقي أساتذه ودكاتره فى الكلام الدبش وكسر الخاطر والخذلان ،
الحب والحنان والمشاعر مش بفلوس ،
وفلوس العالم ماتقدرش تشتريهم ، يعنى مش هنخسر حاجه لو قدمنا قلوبنا بكل الحب والحنان والأمتنان لكل واحد له فضل علينا ، مش هنخسر حاجه لو قولنالهم كلام حلو بدون سبب ، لو حاولنا نخفف عنهم على قد ما نقدر بأبسط حاجه . وقتها بس هنحس بحلاوة الدنيا بجد مهما كانت صعبة علينا ،
وأخيرا ، متأجلوش الحب وتستنوا لما تصحوا الصبح متلاقوش الناس ال بتحبوهم ،
هيفيد بإيه تحبونى لماأموت
هيفيد بأيه قصايد عشق على قبري وأنا ماسمعتش منها حرف فى حياتى ،
محدش معاه شهادة ضمان للحياة ،
زمان قالوا لا تخبئوا الكلام فلن يرثه أحد ليقوله ، ولاتأجلوا الرسائل فقد تتغير العناوين
حلاوة الدنيا
بقلم / نورا عواجه