الجزء الأول / شيفاتايمز
بقلم /شيماء عامر
التطوير يبدأ من مرحلة الخطوبه
والفايدة من فترة الخطوبة بتدى فرصة للخطيبين و الأهل انهم يكونو على علاقة صادقة بينهم و بين بعض.
فيه مثل بيقول " كل خاطب كاذب " يعنى كل طرف سواء الخاطب و المخطوبة بيكذب على التانى وزى ما بنقول احنا المصريين " كل واحد بيظهر أحلى بضاعة عندة للطرف الأخر "
علماء الاجتماع بينصحوا بمحاولة التطويل فى الخطوبة و بالذات اليومين دول مفيش حاجه مضمونه نتيجة انتشار الكذب و الخداع والتعارف من النت وتلاقى عالنت أمير وهو أساسا بواب.
فترة الخطوبة أهم حاجه فيها الارتياح النفسى والقبول بين الاتنين و المعلومات اللى كل طرف قدر يجمعها عن التانى و مدى الصدق ومفيش مفر من فسخ الخطوبة اذا إكتشفى أن الخطيب بيكذب عليكى فى أى معلومه
خدى بالك من الحوار فى الفترة دى وركزى على الاهتمامات الخاصة و الهوايات وماتخجليش من الكلام عن مخاوفك واحلامك و طموحاتك فى المستقبل. ---> ممكن تاخدى كورس ازاى تقنعى الناس برأيك
---> واعرفى أن الحوارات دى تكشف الغموض فى شخصية خطيبك
¤ فترة الخطوبة بعتبرها أعظم فرصة حقيقية للتعارف و الدراسة و تختبرى سلوك خطيبك وهى الحجر الأول للعلاقة بينك وبينه واللى على اساسة هتمشى مركب حياتكم
¤ اعرفى نقطه مهمه وهى ان الضمان الوحيد لإستمرارو نجاح جوازك أن يكون فيه نوع من أنواع الارتباط و الإنجذاب العاطفى ، لأن العلاقات الانسانية مافيهاش ضمانات مادية زى الأجهزة الكهربائية و لكن الضمان القوى هو الضمان العاطفى.
أما الضمانات المادية زى مؤخر الصداق اللى الناس بتغالى فيه و بيمنع شباب كتير من الإقدام على الطلاق فعلاً و لكن مش هيرغم الزوج انه يحب زوجتة.
حاجه مهمه جدا أحب اقولها
فى الخطوبه بتعبرى لخطيبك والعكس كمان الخاطب يعبر لخطيبته ايه اللى بينتظره أو بتنتظريه منه بعد الجواز علشان يعبرلك عن حبه وسعادته بيكى يعنى اكتر حاجه تسعده منك ايه
مثلاً : فيه بنات فاهمه أن الحب اللى بتنتظرة بعد الجواز هو أن يوفر الزوج لها حياة مرفهة كلها خروجات وتهريج وسعاده وسفر
وفيه رجاله بتفهم أن الحب اللى بينتظرة من زوجتة بعد الزواج هو أن زوجتة تستناه بعد مايرجع من شغله و تخلعله جزمته وتقابله بالفوطه السخنه و ترحب بيه وتجهزله الميه بالملح
علشان كده بقول للطرفين واحنا جروب صحيح مافيهوش رجال لكن ممكن يكون ابنك أو اخوكى خاطب فانصحيه ان أثناء فترة الخطوبة يعرف كويس جدا ازاى يفهم شريك حياته المستقبلى معنى الحب وايه طريقة التعبير المناسبة عنة الذى هو يفهمها ويحبها و ده علشان يقدر يتعامل بالطريقة السليمة معاة.
قبل الجواز لازم يكون الطرفين مقتنعين ببعض وكل طرف يكون أكبر قدر من المعلومات الصادقة عن الطرف التانى ويكون قدر أنه يفهم أهم الجوانب الاساسية فى شخصيتة.
ودمتم فى سعاده
Shaimaa Amer