بقلم نورا عواجه
تقريباً مفيش حد مننا مجربش إحساس الغربه . سواء هو أو حد من أهله
مفيش حد فينا محسش بوجع الفراق
الغربه مٌره . الغربه كربة . الغربه صعبة . الغربه وحدة . وتعب وشقى وحاجات كتير قوى حزينة وبتوجع ..
الغربة . يعنى عريس بيسيب عروسته قبل ما يشبع منها ،
وعروسه محرومه من حبيبها فى شهر العسل .
الغربة يعنى طفل بيتولد وأب محروم من إحساس وجود أول طفل فى حياته . وأنه يحضنه ويشم ريحته ، ويبوس جبين مراته ويقولها حمد الله على السلامه يا أم عتريس .
الغربه يعنى . زوجه شايل هم الدنيا والآخرة فوق دماغها ومش عارفه تتصرف فى حاجات كتير لأن زوجها غايب .
وزوج بعيد قوى علشان خاطر لقمة العيش وتوفير الحياة الكريمة لولاده لأنه معرفش يلقاها جوا بلده مع الأسف ،
ومفيش فى أيده حيلة ولا حل ،
وكل ال بيجمعه بولاده شاشه تليفون
صامته ميته مفيهاش أى روح
أو حياه . وكل واحد فيهم شايف التانى بصوره مهزوزه وصوت مشوش ،ومحدش فيهم قادر يمد أيده يلمس التاني
والوجع ساعتها بيبقى أكتر من أى وقت لأن كل واحد فيهم محروم من حضن حبايبه ..
الغربه يعنى .. إنسان مريض لوحده
مش لاقى حد يهتم بيه . يحزن لوحده ويبكى لوحده .ينام ويصحى لوحده.. ويمكن كمان يموت لوحده . (ربنا مايحكم على أى حد بالوجع ده )
الغربة يعنى أخ وأخت يتجوزوا وأبوهم او أخوهم الكبير بعيد .
الغربه يعنى رمضان من غير لمه وعيد من غير فرحه .
الغربه يعنى شاب يسافر علشان يجمع فلوس علشان حبيبته ال متمناش غيرها فى الدنيا . برجع يلقاها أتجوزت .
الغربه يعنى أب أو أم يموتوا من غير ما أبنهم يشوفهم ويتحرم حتى من وداعهم وأنه يدفنهم وياخد عزاهم
الغربه يعنى وجع يتم
فراق وحده وكسرة خاطر
يعنى ذل من ناس غريبه .
يعنى إجبارك أنك تعمل طول الوقت حاجات أنت مش بتحبها ولا عايزها . بس المضطر يركب الصعب
وبعد كل ده تلاقى بعض الناس
تقولك يابختهم دول عايشين برا
وبياخدوا فلوس على قلبهم قد كده
دول بيقبضوا بالدولار والدينار
ده بغير عربيته كل سنه وساكن فى فيلا
وده بنى عماره .. وده وده وده
ياريت قبل ما نبص على الفلوس
والتليفون الغالى والعربية والشقه
نجرب نحط نفسنا مكانهم
ونحاول نحس بوجعهم وخوفهم
ووحدتهم . ياترى هنقبل ؟
قبل ما نحسدهم ونتمنى نكون زيهم
وكل أحلامنا تبقي فى جواز وشنطة سفر ياريت ندعيلهم
يارب هون الغربة على كل متغرب
يارب أحفظهم وأحميهم ورد غربتهم
يارب سهلهم رزق جوا بلدهم ووسط أولادهم .
يارب خفف وجعهم ووحدتهم ويسر لهم كل عسير
وفي النهاية، تبقى الغربة تجربة إنسانية مؤلمة . ومهما طال السفر يبقى القلب معلقًا بأول مكان أحتضنه ، ويبقى الشوق للوطن والذكريات وقود الروح حتى اللقاء .