2025 هدعى وقولوا آمين
بقلم نورا عواجه
ساعات قليلة ويبدء عام جديد كل سنه وحضراتكم جميعاً بألف خير وصحه وسعادة وراحة بال يارب ، معروف طبعاً أن (بداية عام ميلادى) فرحة وهيصة على مستوى العالم وإستعدادات خيالية فى بعض الدول ، فى الوقت ال المفروض أن ( بداية عام هجرى) يكون الأهم والأولى بكل الإحتفالات دى ،
والأهم إن كل تكاليف الإستعدادات الرهيبة دى تتصرف على الفقراء والمساكين والمحتاجين على مستوى العالم ،
المهم أنا حبيت أبدء السنة الجديدة معاكم بدعاء بتمنى من ربنا يحققه ليا وللجميع ،
بدعي أن ربنا يرزقنا بناس حلوة ونضيفة (مقصدش شكلها حلو ولا مستحميه ) أقصد حلوة ونضيفة من جواها بجد وبحق وحقيقى ، يعنى بتحبك كده لله من غير هدف ولا غاية ولا طمعانة فى حاجه ، بتتمنالك الخير زى ماقال الرسول صل الله عليه وسلم ( لايؤمن أحدكم حتى يحب لأخيه ما يحب لنفسه) وتفرحلك بأى خير يجيلك وتشوف الفرحة فى عيونهم ، ناس صافية بوش واحد .
أه والله أرزقنا يارب بناس لها وش واحد بس !! واللي تقوله فى وشك هو اللي تقوله من وراك ..
أنا أكتشفت بعد العمر ده أنه أصعب حاجه أنك تتعامل مع الناس ال بوشين ، تبقى حضرتك بتتكلم وتضحك وتقول اللي جواك بكل طيبة ونية صافية ، واللي قدامك بيستغل ده بدم بارد وبمنتهى البجاحة ..
المهم تلاقيه بيتكلم عنك بناء على ضميره ونيته هو ؛ مش كده وبس ده كمان بينقل الصوره دى للناس ، ويحاول بكل الطرق أنه يكرهم فيك
وإحنا طبعاً منتوصاش النمله عندنا بتبقي جمل ربنا يهدينا على نفسنا ويهدينا على الناس ، وأرزقنا يارب (بناس حنينة) حنينة بمعنى الكلمة .. أصل الحب الحقيقى والحنان بقوا عملة صعبة جداً جداً اليومين دول ، ناس لما تشوفهم قدامك تحس أن الدنيا لسه بخير ، ولما يكلموك تحس أنهم بياخدوك بالحضن وحضن حنيين أوى كمان ،
أرزقنا يارب (بناس طيبة وع الفطرة) واللي فى قلبها على لسانها على طول ، لا بتلف ولا بتدور ولا بتحور ولا تعرف اللؤم ولا الخبث ولا النفاق . وأرزقنا يارب (بأولاد الأصول) المحترمين المؤدبين المتربيين واللي بيعرفوا العيبه ومستحيل يعملوها .
واللي بيحترموا الكبير ويعطفوا على الصغير زى ما قال سيدنا محمد صل الله عليه وسلم (ليس منا من لم يرحم صغيرنا ، ويوقر كبيرنا ويأمر بالمعروف وينهى عن المنكر ) اللي ليهم كبير وبيعملوله ألف حساب والناس ال بتحترم الست وتقدرها بجد ويتقوا ربنا فيها وبيعاملوها بما يرضى الله ، أرزقنا يارب بأهل الخير اللي كل همهم ربنا وبس واللى مش بيحسبولها حساب ولا بيردوا محتاج ، اللي عارفين ومتأكدين أن ربنا عنده العوض وأكتر ، وعندهم إستعداد يصرفوا آخر جنيه معاهم مدام لله (من ذا الذى يقرض الله قرضاً حسنًا فيضاعفه له أضعافاً كثيرة )
أرزقنا يارب الصبر والبال الطويل ..صبرنا على المحن والإبتلاءات ، وصبرنا ع الناس القاسية قلوبهم اللي معندهمش رحمة ولا يعرفوا معنى الإنسانية . وعلمنا نحمدك ونشكر فضلك ونعمك اللي نسيناها وسط الهموم وكأنها تحصيل حاصل .
مش عوزين نبقي زى القطط تاكل وتنكر ..
يارب أرزقنا الرضا باللي كتبته واللي أنت شايفه خير وأحنا مش شايفين ولا صابرين ولا فاهمين حكمتك ،
يارب أحفظلنا الناس الحلوه اللي بتحبنا بجد وبتفتكرنا وبتخاف علينا ،
اللي بتصلى وقبل ماتخلص صلاتها تدعيلنا من قلبها وأحنا منعرفش ، باركلنا فى القلوب الطيبة الحنينة اللي شيلانا ومتحملانا بكل عيوبنا . اللي حاسة بكل الكركبة اللي جوانا ولسه واقفين جمبنا وساندين وماسبوناش نتخبط لوحدنا ومهما يحصل نلاقيهم فى ضهرنا ..
يارب أحفظلنا الآباء والأمهات والأولاد والأخوات والأصدقاء اللي هم عزوتنا وسندنا بجد واللي الدنيا متنفعش من غيرهم ولا ليها طعم واحفظلنا صحتنا من الأمراض التى لا شفاء منها واشفى كل مريض بيتألم وأنت وحدك العالم بحاله والقادرعلى تخفيف آلامه ،
يارب قوى الضعيف والأرملة والمطلقة وال شايله الشيلة كلها لوحدها ، و أكرم المسكين وقليل الحيلة ، يارب صبرهم وقويهم وقدرهم على حملهم التقيل فى الأيام الصعبه دى ، يارب زوج شباب وبنات المسلمين، وأرزقهم رزق فاطمه بنت النبي عليه الصلاة والسلام بسيدنا على، وجمع كل القلوب المحبة واللي ناوية الحلال على كتابك وسنة نبيك ، يارب اجعله عام خير ومحبه وسعادة وفرحه وأمل ، يارب أجعلها سنه مباركه ، لا فيها حزن ولا ألم ولا يأس ولا فقدان ولا خذلان ، خلاص تعبنا واستكفينا ، عشمنا فيك كبير تجبر بخاطر كل مكسور.
يارب أرحم كل اللي فارقونا وأخدوا معاهم حتة من قلوبنا وروحنا وسابونا ناقصين كل حاجه ، يارب أرحمهم وأغفر لهم وتجاوز عن سيئاتهم ، وأجمعنا بيهم فى الجنه زى ما جمعتنا فى الدنيا، وأرزقنا يارب من فضلك وكرمك زيارة لبلد نبيك وحبيبك محمد صل الله عليه وسلم من غير حول منا ولا قوه فقد ضاقت السبل عند البشر ، ولكن سبلك ياكريم لا تضيق ، وأرزقنا يارب جميعاً حسن الختام ،.
عام سعيد...
وكل عام وحضراتكم جميعاً بألف خير ...
لاتنسونى من صالح دعائكم
والسلام ...