بقلم/ نورا عواجه
مدير مكتب الأقصر
المخرج حسين كمال لما كان بيحضر لمسرحية ريا وسكينة وبيحط تصوره للأدوار والشخصيات أخد قرار جريء لما رشح النجمة شادية لدور "ريا" في أول تجربة مسرحية في تاريخها وفعلأ أتصل بيها عشان يعرض عليها الموضوع.
أول ما شادية سمعت منه كلمت "مسرحية" كان ردها حازم وعنيف جداً وقالتله "أنا مش حضحى بتاريخي عشان خاطر حضرتك" واتأكد حسين أن مهمته مستحيلة لكن ما أستسلمش وقرر يعمل حركة خبيثة عشان يقنعها تقبل الدور ...
بيحكي حسين أنه كان فاهم شادية وعارف أن عندها "عرق تركي" يعني دماغها ناشفة بس في نفس الوقت "قلبها حنين" عشان كده قالها خلاص أنسي الموضوع بس أنا عايز منك خدمة تساعدي أخوكي بيها عشان المسرحية دي مهمة بالنسبالي ورأيك يهمني .. أنا حبعتلك أول مشهد تقريه وتقوليلي رأيك وياريت بخبرتك ترشحيلي حد يعمل الدور مكانك ...
رحبت شادية جداً وقرت المشهد الأول .. وبعدين كلمته وقالتله أنه عجبها جداً راح باعتلها المشهد التاني ومشهد جر مشهد لحد ما قرأت التلات فصول كلهم واتثبتت وكلمته تاني عشان تقوله قد أيه عجبتها الرواية وكان رده "مش قولتلك أنا مش شايف حد غيرك للدور أيه رأيك ؟!".
رغم إعجابها بالنص لكن شادية قالت لحسين إنها خايفة جداً وما عندهاش أي خبرة في المسرح وخايفة ده يأثر على جماهيريتها لكن رد حسين قطع شكوك شادية لما قالها "لو فشلتي أنت لسه شادية برضه أنا اللي حتهاجم وحيقولوا حسين كمال بوظ تاريخ شادية .. أنا اللي حاخد الرصاص بدالك".
وفعلا بدأت شادية الشغل في المسرحية عشان تكون أول وآخر تجربة مسرحية في تاريخها ... وشادية اللي كانت خايفة من الفشل كانت أهم أسباب نجاح المسرحية وده بشهادة النجمة "سهير البابلي" اللي رغم أنها كانت نجمة مسرح كبيرة وقتها لكن قالت إن شادية جابت جمهور جديد ما كانش ممكن المسرحية دي توصله .. لكن الجمهور ده جه عشان يشوف شادية على المسرح ...