كتبت/مـــــروه البطـــــــل
1 – اشربى مياه ❤ :
اول و اهم سر هو شرب كمية كافية من المياه كل يوم فى اى فصل من الفصول حتى الشتاء لان كوب المياه اللى بتشربيه هيكون مفيد لنضارة بشرتك و صحتها اكثر من اى منتج هتشتريه
2 – الترطيب ❤ :
احرصوا ان يكون عندكم كريم مرطب فى اساسيات اليوم تستعملوه على الرقبة و الوش و اليدين و الرجلين لان المناطق دى اول مناطق بيبان عليها السن و تقدم العمر و المرطب بيحافظ على بشرتك من التجاعيد و الترهلات و الجفاف اللى بيأثر على جمالك .
3 – استخدمى غسول للوجه ❤ :
استخدمى غسول للوجه يوميا عشان تشيلى بقايا المكياج و اى اثار للتلوث من الجو من على وشك و احسن حاجة تستعمليه مرة الصبح و مرة بليل قبل النوم لان ده هيساعد على تنظيف المسام من التراب اللى عالق فيها و بالتالى وشك هيبان اجمل الصبح و طول اليوم.
4 – استخدمى التونر ❤ :
التونر ده سائل خفيف تستعمليه بعد غسول البشرة و لازم تعتبريه جزء اساسى من روتين تنظيف بشرتك اليومى لان اغلبنا بينساه بعد الغسول و المرطب و دى حاجة مش صحية لان بعد غسيل الوش المسام ساعات بتكون مفوحة و التونر بيساعد على قفلها و شد البشرة و التخلص من اى زيوت او دهون على الجلد و بالتالى بيمنع تكون الحبوب .
5 – غسيل الشعر ❤ :
استعملى الشامبو المناسب لشعرك كل 3 يام على الاقل عشان تحافظى على بريقه و لمعانه لان شعرك لما مش بيتغسل لفترة طويلة بيفرز دهون و ممكن تأثر على شكلك الجميل و كمان بتنقل الدهون دى لوشك و بتسبب فى ظهور الحبوب و شعر الانثى هو تاج جمالها و لازم تحافظ عليه .
6 – استخدمى كريم واقى من اشعة الشمس ❤ :
مهما كنتى مستعجلة الصبح لازم ركزى فى اهمية الكريم الواقى من الشمس لان اشعة الشمس و خصوصا فى الصيف ليها تأثير مضر جدا و سىء على جلدك و بشرتك و ممكن متلاحظيهوش غير بعد فترة . لو عايزة تحافظى على مظهرك طبيعى و جذاب و جلد صحى لازم تستعمليه الصبح .
7 – المياه السخنة و الليمون ❤ :
حاولى تتعودى انك تبدلى الشاى او القهوة الصبح بكوب ليمون و مياه دافية لان شربهم الصبح فى اول اليوم بيساعدك على التخلص من السموم فى الجسم و بيقلل من حساسية الجلد و بيخلى جسمك مرطب و لامع طول اليوم .
8 – تقشير الجلد ❤ :
استخدمى ماسكات طبيعية للتقشير من الوصفات اللى موجودة فى بنات حوا او استخدمى اى منتج بتفضليه من الصيدلية مناسب لتقشير جلدك لان التقشير الاسبوعى بيخلصك من الجلد الميت و بيمنع جفاف الجلد و بيخلى وشك دايما ناعم و منور و جميل .
9 – حواجبك ❤ :
عشان تحافظى على جمالك لازم تخلى بالك من شكل حواجبك لان هما ممكن يغيروا شكل وشك تماما راقبى شكلهم فى المراية و شوفى اذا كانوا مناسبين لوشك و لا لا و هيكون من الاحسن لو تخنتى حواجبك لان الحواجب الرفيعة بتقلل من جمالك و ممكن تكثفيهم عن طريق استخدام زيت الخروع او زيت جوز الهند كل يوم الصبح و هتلاحظى نتيجة بعد 3 شهور .
10 – الشفايف ❤ :
دى اكثر حاجة واضحة فى وشك و بتظهر جمالك و لازم تركزى عليها جدا لو سبتى شفايفك جافة و مشققة اكيد هيكون شكلها مش حلو لازم تستخدمى مرطب ليها كل يوم و تجنبى انك تتعرضى للشمس كثير و اعمليلها مساج بليل مرتين في الاسبوع 5 دقائق بفرشاة الاسنان عشان تساعدى على تقشير الجلد الميت فيها و تمنعى التشققات .
11- قصة الشعر ❤ :
من اكثر الحجات المهمة و اللى بتغير شكلك هى قصة شعرك لو عرفتى تعمليله قصة حلوة و شيك و جذابة مش هتحتاجى مكياج يظهر جمالك كل 3 شهور او شهرين لازم تقصى الطروف عشان تحافظى على عدم تقصفه . لو مش عارفة ايه القصة المناسبة ممكن تجربى كذا حاجة او تستعينى بخبرة صالون تجميل متميز .
12 – فيتامين سى<3
فيتامين سى من اهم الفيتامينات اللى بتحافظ على نضارة جلدك واظبى على استخدامه فى اكلك يوميا و الصبح ممكن تشربى عصير ليمون او برتقال طبيعى او تاكلى برتقالة مع الفطار و ده كمان هيساعدك على النشاط و الحيوية فى باقى اليوم . العصائر الحمضية زى الليمون فيها مواد بتصرف السموم من الجسم و السموم دى ممكن تأثر على جفاف الجلد و عدم نضارته ممكن كمان تلاقى الفيتامين ده فى فواكه و خضروات كثير زى الجوافة و الفراوله