حوار/أسماء مالك
ممكن تعرفينا عليكي؟
إسمي/ نهاد محمد حسن صالح
من نصر النوبة قرية قسطل
خريجة دبلوم فني صناعي قسم زخرفة
طول عمرى كنت بحب الرسم والألوان
ومن صغرى عندي هواية الرسم ابتديتها برسم الشخصيات الكرتونية وبعدها اتعلمت ارسم علي المراياوالجدران من خلال المدرسة.
إيه اللي خلاك تفكري في الريزن؟
حبيت أعمل لنفسي مشروع وماكنتش عارفة أعمل إيه وكنت تايهة خالص بالصدفة لقيت علي اليوتيوب فيديوهات عن الايبوكسي ماكنتش فاهمة ولا عارفة ايه المادة اللي شغالين بيها دى قعدت سنة بتفرج عليها كل يوم زى مسلسلات التركي حبيت الموضوع جدا وفكرت إزاي استغل الفرصة دى واعملها مشروع مربح ليا بالفعل
من فين كانت البداية ومين دعمك ؟
اخدت كورس ريزن عشان أعرف ابتدي صح
ابتديت ب5000 قولت اشوف الدنيا هتمشي معايا إزاي وبدأت أنفذ شغل فعلآ ومن كرم ربنا إني بعتهم كلهم من خلال المحافظة لأن هيئة الاستثمار في المحافظة بعتتلنا إشارة كحرفين نبعت لهم أشغال يدوية عشان يعرضوها في معارض في الساحل كنت مبسوطه أوي بالخطوة دى.
وفي يوم مؤسسة ام حبيبة كانت منزلة إعلان عن تدريب ريادة الأعمال ومنح الفائزين بمبلغ مادى روحت وقدمت بمشروع الريزن والحمدلله اتأهلت للفاينل ووصلت للمرحلة الأخيرة وفوزت بمبلغ 20000 بفضل الله ودلوقتي أنا فاتحة ورشة ريزن نييها والحمدلله بعمل عينات شغل عشان أنزل اسوقها وان شاء الله أحقق هدفي بإن أكبر إسمي ريزن نييها في مجال الريزن.
اخيرا تحبي تنصحي الشباب بإيه؟
انصحهم بتعلم المشغولات اليدوية وتصنيعها لان حاليا الدولة تتجه نحو هذا الاتجاه وتشجعه وتنميه